Gen 47 | ATA | STEP | Xe Iosepu muavuti la muuoloi'a ta vimovimou ta'uve sou ilo'a milai mixali noxou tatananu tuala ne Aixiputo. Ilo'a milai xe mixali noxou la Iosepu muvikalanu aloxo 'o, “Mamilo ilo'a ta viivilo mo ta sipsipi'a ilo'a ta kaui'a mo ta kamelii'a mo ta donkii'a mo ta meei'a me'a ne Kanani mo a mine'e mo a ixoo ne Xosen. Mitavule lavulavulutii'a piena misevile kalumo mune'e.”

a 47:29-30Tav 49:29-32, 50:6

Genesis 47

1 Xe Iosepu muavuti la muuoloi'a ta vimovimou ta'uve sou ilo'a milai mixali noxou tatananu tuala ne Aixiputo. Ilo'a milai xe mixali noxou la Iosepu muvikalanu aloxo 'o, “Mamilo ilo'a ta viivilo mo ta sipsipi'a ilo'a ta kaui'a mo ta kamelii'a mo ta donkii'a mo ta meei'a me'a ne Kanani mo a mine'e mo a ixoo ne Xosen. Mitavule lavulavulutii'a piena misevile kalumo mune'e.” 2 Xe muno'a ta vimovimou ta'uve e muiloi'a ne sou milai noxou tatananu tuala.

3 Xe anu tatananu tuala muavuti la mutali'isi'a, “Xaixai ma'i ane ngingi ngaxoxoo la nga'au'ausou sou nga'oxo'oxonu?” Xe ane'i miavuti la mikolinu aloxo 'o, “Tatila, nexi ta mitema vitanisi 'o, nexi ta mitema sou tasaxisaxila'a ta sipsip aloxo ta xasixasixe tatei.” 4 Xe miavuti la mivikalanu aloxo 'o la, “Nexi tene'e 'o xo soli tila 'o mulai mutaasixe mo mu'oki'oki tani no xalee noxixe ne Kanani mo nexi ia'eia'e sou ta sipsipmexi ilo'a ta kaumexi uasisi manina. La sou ane nexi tene'e 'o sou taxolu lai 'o, ia taxolu maxuveeni uasi. Ia tatila, vaimomo 'o, nexi temasaxa lexe nini opoone usexelaixesi mo nexi taxoo ane ne Xosen ne.”

5 Xe anu tatananu tuala ne muavuti la muvikalanu Iosepu aloxo 'o, “Mamine ilo'a ta viivine ane mine'e mo mixali noxine 'o sou ngongi'a ngaxolu lai ne Aixiputo 'o. 6 Na'italone'i mo ixolu no xalee lia vile ane lailaixe misevile. Ieni uvaxai'asi mo ilai ixolu ne Xosen, xo anu lia xalee ane ne anu laixe musuku. Xe lexe nelavu lexe, se'i no nixi noxi'a ne milavu lailaixe musuku no anu xaixai ane sou isaxisaxila'a ta sipsip ilo'a ta kau lailaixe misevile, la mene nasosovosi'a ka nalai na'italone'i sou isaxisaxila'a eni ta na'axeni ta sipsip ilo'a ta kau.”

7 Xe ili'i la, la sou Iosepu muno'u momu Iakovo sou mune'enu noxou tatananu tuala ne. Xe Iakovo muavuti la mualusou lexe, “Lataua uxoo noxine mo ualusine.” 8 Xe tatananu tuala muavuti la mutali'isou Iakovo aloxo 'o, “Tauu iexene ta'ei?”

9 Xe Iakovo muavuti la muvikalanu lexe, “Maulixo sou xoluxolu mo xixaoxao no lia 'o muxali loxo tauu ie itemaxu ta'uve mo mavulovexa tatalusi. Tauu ie piena uasi, ia tu'utu'umaxu piena misevile muxalisilo. Ta xasixasilosi ne mixolu mo mimauli maxuveeni misevile mo tauu iexa'a ne veveeni misevile no anu ane noxilo.” 10 Ilou muvivikala aloxo ne xe mukalu, la sou Iakovo mualusou ka muioonu io sou mulivu mulai.

11 Ilo'a tatananu tuala mivivikala aloxo xe mukalu, xe ili'i la sou Iosepu mulai sou mu'oxo loxo tatananu tuala muvikalanuxu sou musu'uline'i momu ilo'a ta vimovimou sou mu'italone'i no lia xalee vile ne Aixiputo ne. Mulai mu'italone'i no anu lia no tuala ne Lamesesu. Lia sou tuala xalee ane ne laixe misevile. Muuli no anu lialia ne Aixiputo mukalusi. 12 No voxo sou soli toxoxa'a ane ane'i ixoxolixu ne, la Iosepu iou si'isi'a momu ena uasi, la'ilali a ulalai noxi'a sou i'o'ou. Momu mo ta vimovimou mo, momu ta minuminu mo moso ane ta molomolo ne ukalusi.

Ta Mitema Milotoxa'a La'ilali Noxou Iosepu

13 Soli toxoxa'a e muxali ne, muxoo maxuveeni mole mu'oki tani mole la'ilali sevile uxolu no xalee lia sevile loxo uasi manina. Ta mitema sou tuala ne Aixiputo mo ne Kanani ne misoisolixa'a mole xavine'i la uasi manina. 14 Ta mitema ine'e sou iloto la'ilali, la Iosepu utaxusou lamoli ne sou ulai umuxaxu noxou tatananu tuala ne Aixiputo taasou. 15 Xe ta mitema ne Aixiputo mo ne Kanani ilai ilotoloto la'ilai xe lamoli'a ukalu manina, la ane'i ilai noxou Iosepu la ivikalanu aloxo 'o, “Naitinexe la'ilali, xe uasi la nexi tasoisoli sou soli avile. Nasu'ulinexi no anu vote'i vile mo nexi tamauli xo nexi lamolimexi ane mukalukalu ne.”

16 Xe Iosepu muavuti la muvikalane'i aloxo 'o, “Lexe ngingi lamoli sou ngalotongenge la'ilali no anu uasi, la ngano'a ta sipsipmengi ilo'a ta kaumengi ine'e noxilo la sou eni aitingenge la'ilali.” 17 La sou ane'i mino'a ta mii loxo ta oosii'a ilo'a ta sipsipi'a mo ta meei'a mo ta kaui'a mo ta donkii'a ne sou milosou Iosepu, la sou anu muitixa'a la'ilali. Ane'i mi'oxo'oxonu aloxo ne mole tauu ie ano 'o ukalu.

18 Xe no tauu ie ili'i, la ta motu mine'e noxou Iosepu la, la mivikalanu aloxo 'o, “Tila, nexi tamomomo sou tatalumeiou tu'umaxu noxixe noxine uasi, nexi tene'e 'o sou tavikalaneni manina lexe, nexi lamolimexi ane mukalu ne, mo ta sipsipmexi ilo'a ta kaumexi, mo ta donkimexi mo ta meemexi mo ta kamelimexi ane milaimeni mukalu ne. Mii vile la sou nexi talosine la uasi. Nexi vasimexe ilou lialianexesi a uxolu. 19 Ia ieni uvaxaixesi mamu, xo maasi la nexi tasoisoli ulu'e no ieni 'o mo lialianexe uxali masua ukalusi. Nalotonexi mo lialianexe no anu la'ilali mo sou taxali loxo ta mitema sou palupalusou noxou. Ia tila, anu laixe lexe nini naitinexe la'ilali toxosou sou tatounu mo sou temanu la ta'ou, xe uasi, la nexi tasoisolisi. Nexi tamasaxa lexe nexi taxolu laixe mo lialianexe uxali masua uasi.”

20 Anu aloxo ne la sou Iosepu mulotonu lialia ne Aixiputo ne mukalusi xou tatananu tuala to ne. Ta mitema ne Aixiputo vilevilesi ne mulotonu lialiaxa'a mukalu, xo soli u'oki'oki tani manina avile. Lialiaxa'a ne mulai tatananu tuala tila na'u mukalu ne. 21 Iosepu muvikalane'i lexe ta mitema ne Aixiputo no xalexalee tuatuala ukalusi ne, mi'umesou liaxa'a mo misuku milai mixolu no tuala tila se'i. 22 Ia Iosepu ulotonu lia xalexalee noxi'a ta aili'i uasi, xo tatananu tuala ulolosi'a lamoli la sou ane ane'i ilotoloto la'ilali no anu ne. La sou ane lialiaxa'a muxolusi ne.

23 Xe Iosepu muavuti la muvikalane'i ta mitema aloxo 'o, “Ngalomu, vaimomo 'o eni elotongengi iu tatananu tuala, mo elotonu lialiangenge kalumo ne lexe xou, ia la'ilali ngiangiaxu, ngano'u mo ngatootou ulu'e no lia 'o. 24 Ia ulai ili'i xe unene'a xe tematemanu, la ngano'u la'oluxu vile no anu la'oluxu ta'uve ulai noxou tatananu tuala. Xe la'oluxu tami'a ne ngamuxaxu, se'i sou ngatounu xe se'i sou ngongi'a ta 'ili'ilinge mo ane'i ane ngongi'a ngaxoxoo ne nga'ou.”

25 Xe ta mitema ne miavuti la mivikalanu Iosepu, “Laixe musuku xo nini nepamaulinexi mole ane nexi latala 'o temauli laixe 'o. Mo ane nexi taxolu loxo ta mitema noxou tatananu tuala sou upalupalusixexu mixumixu sou ta'oxo'oxonu.”

26 La sou Iosepu muxalixu vote'i vile no nano ne Aixiputo ne lexe, ta mitema itootou la'ilali xe ulai ili'i xe temanu xe lingamo, xe imolou la la'oluxu vile no anu la'oluxu ta'uve ne ino'u ulai noxou tatananu tuala. Vote'i ane ne, a uxoxoolu sio mo a imumulinu mo mutalo vaimomo 'o. Ia ta alili'i ne, lialiaxa'asi 'a Iosepu ulotonu ulai xou tatananu tuala uasi.

27 Io, ta Isilaeli e mine'e mixolu ne Aixiputo no xalee lia ne Xosen ne, mipalaa ta 'ili'a mole mixali tavu'alo misevile, mo mi'ami'a ilou mixamixa'a kalumo ne tavu'alo misevile.

28 Iakovo e mune'e kalumo sou ilo'a mixolu ne, mune'e muxolu mole tauu iexu mulai muxali loxo mavulovexa mo mulelia ta'uve mo muvaxasimi tamei. La sou tauu iexu maulixu mutelai loxo itemaxu ta'uve mo mavulovexa tami'a mo muxatele tamei (147). 29 ^aXe voxo a 'ala'alai sou Isilaeli usoli, la mu'avalou 'olu Iosepu sou muvikalanu aloxo 'o, “Lexe nemasaxailo manina, la namuxaxu avone no laaxu poxo'ilo mo napala'alixu taneni lexe nini namaxa'u alauna noxine noxilo mo lexe eni asoli, la na'asixo lai ne Aixiputo 'o uasi, 30 ia lexe eni ieli uvuvu sou alai noxi'a ta xasixasilo ane'i ane misoisoli la natavulenu xalusilo uuatulai no ale ne Aixiputo sou nalai na'asixo ane no pa'ume'a ne.” Xe Iosepu muavuti la mukolinu momu lexe, “Eni amuli masaxa noxine mo a'oxo aloxo nini mene nelemolu ne.”

31 Xe Iakovo muavuti la muvikala la lexe, “Eni amasaxa lexe nini navikala maninasou lexe nini na'oxo aloxo nelemolu ne.” Xe Iosepu muavuti la, la mupala'alixu tanu maninasou noxou momu, la sou momu Iakovo mutangatulu no luusou sou mulotu noxou Lataua.